சபதம்! - மருது அழகுராஜ்

எல்லோருக்கும் புடிச்ச பய
எம்.பி.பி.எஸ். படிச்ச பய..
கருணை உள்ள மனசுக்காரன்
கைராசி மொகத்துக்காரன்....
மூத்த மகன் முத்தப்பனுக்கு
மொறையில பொண்ணு இல்ல
ஊரெல்லாம் தேடிப்பாத்து
ஒலகம்பட்டியில தேர்வாச்சு
பேருபெத்த குடும்பத்துல
பெரிய புள்ள அழகம்மையை
பெரியவுக முன்பாக
பேசி முடிவாச்சு...
ஏழு இலட்சம் ரொக்கப் பணம்
எழுபது சவரனோட
காரு வண்டி கட்டில் சாமான்
கணக்கா செய்யிறதா
கைபுடிச்சு சொன்னாக
சொணங்காம வீடு வந்து
சுற்றங்களை கலந்து பேசி
கல்யாணப் பத்திரிக்கை
'கல்லல்' போயி அச்சடிக்க
நேரங்காலம் சகுணம் பாத்து
நேர்த்தியா கௌம்பயில
தந்திக்காரன் வந்து மறிச்சு
தகவல் ஒன்னு தந்து போனான்
என்ன விசயமுன்னு
ஏடெடுத்து படிச்ச போது
இடி போல இறங்கியது
இப்படி ஒரு சேதி....
"மன்னிக்கவும்
திருமணம் ரத்து
வட்டச் செயலாளருக்கு
முடிச்சுப்புட்டோம்
வருமானம் அதிகமுன்னு"
படிச்சு முடிச்ச போது
படபடப்பு ஆகிப் போச்சு....
காலம் இப்போ மாறிப் போச்சு
கஷ்ட காலமாகிப் போச்சு
கரை வேட்டி கவுரதை
கன்னா பின்னான்னு ஏறிப்போச்சு
அறிவிக்கும் டெண்டருல
அஞ்சு பர்செண்ட் வந்திருமாம்
இடமாறுதல் வேணும்னு
டாக்டருக, இன்சீனியருக
கையில பணத்தோட
வட்டம் வீட்டு வாசலில
வட்டமிட்டு கெடக்காக
சாராயம், சீட்டு கௌப்பு
மாதம் மாமூலே
மூனு டாக்டரு சம்பளமாம்
மேலும்....
மக்கள் நலப் பணியாளர்
சாலைப் பணியாளர்.....
இப்படி
வேலைக்கு ஏத்தவாரு
வெகுமதிகள் ஏராளம்
கட்டப் பஞ்சாயத்து
போலீசு ஸ்டேசன் வருமானம்
அத்தனையும் கூட்டிப் பாத்தா
அசந்து போச்சு மனசு
"இப்படி வருமானம்
பெருத்துப் போன
வட்டத்தை விட்டுப்புட்டு"
சீக்குக்காரன் எதிர்பார்த்து
விட்டத்தை பாத்திருக்கும்
டாக்டருக்கு கட்டித்தர
நமக்குத்தான் மனசு வருமா?
பெருசுக்கு ஏகத்துக்கும்
பெருமூச்சு வந்து போச்சு....
இப்படி....
முத்தப்பனை டாக்டராக்கி
மொத்தமா கெடுத்துப்புட்டோமே!
அதனால
சின்னப்பய உடையப்பனை
சீக்கிரமா....
வட்டமென்ன
மாவட்டமாக்கி
மாமூல அள்ளுறேன் பாரு!
மனசுக்குள்ள எடுத்தாச்சு
மறுபடியும் சபதத்தை!
அதுக்காக முத்தப்பனை
மொத்தமா
விட்டுறத்தான் முடியுமா?
கழுத்துல கெடக்குறத
தலையை சுத்தி எறிஞ்சுப்புட்டு
நாளையில இருந்து
நாடி பார்க்குறத விட்டுட்டு
சாதி பாக்கச்
சொல்லவேண்டியதுதான்.....
அப்படியே அவனையும் ஒரு
டாக்டர் ராமதாசு
டாக்டர் சேதுராமன்
டாக்டர் கிருஷ்ணசாமி
வரிசையில..
எங்களோட சாதிக்கு
முத்தப்பனை தலைவராக்கி
முடிக்கிறேன் பாரு
சத்தியத்தை.....
பெருசு செஞ்சாலும் செஞ்சுபுடுமப்பு......!