காலத்தின் ஒட்டடைகள்

கனல் உமிழ்ந்து
பளிச்சிட்டுப் பிரகாசிக்கும் பொழுதில்
எங்கிருந்துதான் உயிர்க்கிறதோ
இந்தக் கொடுங்கசப்பு
உன் திரும்புதலுக்கான உணவை
எப்போதோ
சமைத்தாகிவிட்டது
தயவுகள் வேண்டா
சுவர்ப் பல்லிகள்
இரவை நோக்கி
காத்திருக்கின்றன

முடிவில்லை
முடிவேயில்லை
என் மீதான அக்கறையின்மைகளுக்கு
இந்த அறையெங்கும்
இந்தப் படுக்கையெங்கும்
அத்துமீறி நுழைந்த கால்களின்
சுவடுகள்
எங்கோ தொடங்கிற்று
பாதைகள் அழிக்கப்பட்ட பாதையில்
அதிசயங்கள் நேரா குகை வாழ்வுக்கு
நமதிந்தப் பயணம்
யாரேனும் ஒருவர்
கொலையாளியாகும் சாத்தியங்களுடன்
ஒன்றாக உறங்குகிறோம்
வண்ண உடைகளுக்குள்
கால காலமாய்
ஒட்டடை படிகிற உடல்
எண்ணற்ற சதிகளால்
புனையப்பட்டதிந்த வாழ்க்கை
ஒட்டடைகள் துளைத்துச் செல்கின்றன

சீன அரசிளங்குமரனைப்பற்றிய கனவினை
தனித்த மாலைப்பொழுதினில் திடீரென ஜன்னல் கம்பிகளில் துடிக்கின்றன
யாரேனும் ஒருவர் விட்டுச் செல்லும்
அதிர்வுகள்
கறுப்பு அங்கிக்குள்
பெருகிச் சிதறும்
யாருமில்லாத
யாரோ ஒரு அன்னியனின் முகம்